$88買粟米皮玫瑰花 過慈善情人節

情人節收花固然開心，如果仲可以幫到人，咁就值得畀個like另一半啦！黛安知道下個月2號至14號，聖雅各福群會將於太古城同又一城義賣玫瑰花，所籌得嘅善款會用來支持有特殊學習需要兒童嘅服務發展。公關姐妹話，今年已經係第15年舉辦情人節玫瑰花義賣，特別製作咗「放閃情緣」玫瑰。玫瑰花由天然粟米皮製成，再用時下最潮嘅燈飾襯托，由牛皮紙製成嘅包裝套包好，造型時尚又簡約，包裝套仲可以摺成環保小包，又靚又實用，每支賣$88。

此外，你亦可報名（詳見：http://event.sjs.org.hk/Rose2018Volunteer/）做義工賣花㗎！