朱古力製黑膠碟 食得仲可以播歌

下個月14號就係情人節，甜蜜嘅情人節當然唔少得朱古力！黛安昨日特登去咗海港城，點解？因為商場即日起到下月25日會舉辦「情‧尋朱古力」活動。

$240買通行證試食

活動首設「朱古力Tasting Bar」，首次引入9個國際朱古力品牌，包括世界上最貴嘅To'ak品牌朱古力，平時每50克已經索價$2,000，不過屆時只要喺海港城花$240購買「朱古力電子通行證」，就可獲得12個「Tasting Token」，盡情喺現場試食啦！

今時今日食朱古力都好講究㗎，昨日黛安就請教咗朱古力品嘗家陳嘉恩（Katie），佢話To'ak朱古力帶有花香、橘子等味道，食落口就好似歎紅酒、威士忌咁有層次。Katie仲講，全球最靚嘅可可豆產地主要集中喺南美洲，而To'ak就係來自南美洲嘅厄瓜多爾，所以品質有一定保證。

朱古力除咗可以食，原來仲可以用嚟聽音樂。昨日大會請咗來自塔斯曼尼亞嘅法藉藝術家Julia Drouhin，將朱古力整成聽得又食得嘅「黑膠」唱片，仲將多首經典廣東歌融入其中，好似歌神許冠傑嘅《天才與白痴》。黛安喺現場見到朱古力都可以播歌，都覺得好神奇呀！