用里數做善事 捐冷衫 助貧童遊樂

平日儲下萬千里數，除可用來換機票，仲可以做善事㗎！黛安呢排同亞洲萬里通嘅公關姐妹傾開，原來今年用里數做慈善嘅新計劃已開始咗，例如可以用3,000里數換件冷衫，再透過「Love + Hope毛衣送暖大行動」送到長者同小朋友手上；亦可以用來換今年友邦歐陸嘉年華入場券，等低收入家庭小朋友可以得到10個代幣，盡情玩一場歡度新春。

想放眼世界，仲可以用里數支援肯尼亞嘅Lewa野生動物保護協會，每9,500里就可以養到1隻小犀牛成個禮拜㗎啦。公關姐妹仲話，會員一直都好善心，唔係剩係諗住去旅行㗎，好似喺舊年已經用咗超過3,000萬里數去做善事捐物資，等於可以圍住地球飛1,200次！