四月麥花臣開騷 劉浩龍扮「鰲拜」影海報

劉浩龍（師兄）昨日宣布4月27日假旺角麥花臣場館舉行一場《劉浩龍Wilfred Lau Action Speaks Lauder Concert 2018》，師兄日前為演唱會拍攝海報，為了搞噱頭，他更在面上黐滿假鬚扮「鰲拜」，夠晒特別。

拍攝當日，造型師將一把紅紅啡啡的大鬍鬚黐在師兄的嘴巴附近，但擺位和落膠水都無take two，平時愛紮紮跳的師兄，只好乖乖坐定定兩個多小時。對於忽然滿面鬍鬚，師兄坦言不太習慣︰「我講嘢似林子祥，但滿面鬍鬚又似鰲拜，尤其係造型師將我啲眉毛畫粗了，睇起來好有殺氣。」

師兄又強調演唱會名稱中的是Lauder非Louder︰「Lau係我個姓，希望可以取其同音，演唱會就係我主場，唱我喜歡嘅歌，講我想講嘅嘢！」提到開演唱會要keep fit，師兄坦言158磅是他的理想開騷體重，但每年12月到2月，都是他的體重高峰期，為了要以最佳狀態開騷，今個新年只好跟蘿蔔糕「分手」。

撰文︰倪小珊

編輯︰黃卉彤

美術︰梁政敏