轉廢為寶設計比賽 THEi學生創作環保服飾

市民嘅環保意識愈來愈高，黛安知道早前煤氣公司就同香港高等教育科技學院（THEi），聯合舉辦「轉廢為寶」時裝設計比賽，一班學生用一雙巧手，將一啲平時被視作廢物嘅碎布、膠樽、光碟等製成時尚服飾。其實只要動動腦筋，廢物都可以再生架！

今次比賽收到逾40件作品，負責帶領學生參加嘅THEi環境及設計學院副教授朱惠靖（Alice）就話，好開心見到學生運用唔同廢棄物料，再加入質感、色彩、輪廓等設計元素，為物料注入第二生命，無論係設計、顏色、剪裁上都有好大突破，緊貼潮流之餘，亦帶出環保信息。

冠軍嘅得獎者係THEi時裝設計（榮譽）文學士課程學生甘子燕，佢用坊間收集得嚟嘅廢棄牛仔布，拼湊成服裝，希望喚起公眾對濫捕同海洋污染嘅關注，黛安都好欣賞佢哋嘅創意。