參與宣明會赤腳行 義助南蘇丹兒童

香港大部分小朋友都係衣食無憂，但位於非洲嘅南蘇丹，由於內戰持續，過去5年，估計已有510萬人陷入糧食危機，甚至達災難級別，南蘇丹嘅小朋友每日面對住飢餓同營養不良，實在令人痛心，黛安身邊唔少姊妹都希望伸出援手，幫下呢班小朋友。

嚟緊農曆新年初九，即係2月24號，就可透過參加世界宣明會舉辦嘅「新春『童』樂赤腳行」來體驗南蘇丹小朋友顛沛流離嘅生活，赤腳行4公里，之後仲可以參加現場攤位、工作坊等活動，譬如建造設備簡單嘅臨時營帳同洗手間、體驗係營帳區入面打水，深刻感受南蘇丹小朋嘅辛酸。

公關姐妹話，2011年立國嘅南蘇丹，自2013年爆發內戰至今，已令到超過400萬人痛失家園，附近嘅烏干達，已收容咗超過100萬名難民，其中60%係兒童。黛安希望大家可以一齊參加活動，有錢出錢，有力出力。

報名費只係$1,000，就可以有2名成人同2名16歲以下成員體驗赤腳行，加多$800就參加埋親子工作坊；活動詳情可到http://www.worldvision.org.hk/cwalk查閱，2月2號就截止報名啦。