旅發局拍新潮短片 推港農曆新年文化

科技發達，為生活帶來方便，連求籤都可以用Facetime！黛安近日就見到條短片，兩個嚟自日本同澳洲嘅小朋友，都越洋用Facetime向車公求籤，車公嘅答案都令佢地笑逐顏開，究竟係咩呢？

首先9歲嘅白井紡生就問車公︰「我可唔可以做到野生動物攝影師啊？」車公解籤後話，過程中可能會遇到困難，唔可以一下子就達成；而8歲嘅Lucas就想去月球喔，車公睇完籤文就答︰「16歲之後就有機會啦！」

段片咁有意思又有趣，原來係旅發局趁農曆新年，拍片同海外旅客介紹香港嘅農曆年地道文化，就好似唔少香港人習慣喺大年初三赤口，到沙田車公廟祈福求籤，所以特別請咗80歲、有23年解籤經驗嘅汪道靈居士出鏡示範。黛安都要畀個like！

除咗汪居士外，仲邀請咗一位地道猛人幫手宣傳，就係有超過40年經驗嘅剪紙大師李雲俠。李大師曾經係美國前總統尼克遜、巳故國家領導人鄧小平、同前國務院總理朱鎔基等人面前示範剪紙。今次就剪出旅發局初一晚舉行新春花車滙演嘅花車，真係好別致！

新年梗係要着新衫、食團年飯，原來「毛小孩」都要！鏡頭前嘅汪星人着上賀年衫，影下街照賣吓萌，黛安都想同佢selfie啊！