內地禁嘻哈紋身藝人 MC Jin：平常心

饒舌歌手歐陽靖（MC Jin）昨日到尖沙咀擔任服裝店開幕表演嘉賓，因參加內地節目《中國有嘻哈》而人氣急升的MC Jin，對於內地最近封殺Hip Hop和有紋身的藝人，MC Jin直言︰「真心講句，聽到呢個消息無擔心過。」

MC Jin昨日即場在店舖內Rap了多首歌，剛從紐約返港的他，今日便啟程到北京。提到內地的封殺傳聞，兩樣都中晒的MC Jin一臉輕鬆表示從來都沒有擔心。

未落實參加《中國有嘻哈2》

他表示：「暫時都無話唔用我，我知道後只係覺得：『吓，咁呀？』，識我嘅朋友都知道，自從有咗囝囝後，工作方面都係平常心，唔會強求，有得做就做，都控制唔到。」他又指《中國有嘻哈》第二季曾提出過想繼續邀請他合作，但暫時仍未落實。

而早前在內地舉行首個個人巡迴演唱會的MC Jin坦言十分開心。「我兩個鐘唱咗23首歌，頭兩首都OK，但之後把聲沙晒。」囝囝和太太當日亦有捧場，MC Jin提起兒子就露出一臉慈父相。「佢好有Hip Hop天份，不過就唔希望佢太投入。」至於他昨日身穿的外套，就連他的偶像亦着過同款，MC Jin興奮表示︰「當年無錢買，今日着得番好開心。」

撰文︰倪小珊

編輯︰林梓添

美術︰梁政敏