《西遊記女兒國》 城城變身暖男版孫悟空

郭富城（城城）第二度在賀歲片《西遊記》系列扮演「齊天大聖」孫悟空，今次在《西遊記女兒國》除了與其他演員大放笑彈外，更要化身「暖男」，與師父唐僧大談兄弟情。這位充滿活力的影帝過足戲癮，期望日後轉戲路多演喜劇︰「其實我好好笑㗎！」

貴為舞台王者，城城在年卅晚在港公映的《西遊記女兒國》可謂犧牲不少，全因他演的「老孫」要全身黐滿毛，又要在台南拍攝，他戲言受盡煎熬︰「平時拍呢啲戲會在冬天零下度數開工，但台南天氣比較暖，要化四小時粧，上咗粧就知唔掂，日日好似畀針拮住做戲，拮足三個多月，對我係好大挑戰！」城城不諱言今次演老孫可算是入行至今最辛苦之作，日後再接其他角色都難不到他。

戲中，老孫的師父唐僧（馮紹峰飾）與女兒國國王（趙麗穎飾）產生感情，而他與師父的師徒關係亦為劇情帶來衝擊，城城自誇今次化身「暖男」版老孫。他笑言︰「我和師父關係微妙，好錫佢，好溫柔，亦有少少呷醋，但又好體諒師父嘅愛情，好有暖男感覺！」

中式超級英雄

難得兩度飾演家傳戶曉的角色，城城直認今次的孫悟空有力量兼且天馬行空，希望將角色打造成「中國式」超級英雄。他說︰「美國有鐵甲奇俠、超人、蝙蝠俠，中國點會有呢類超級英雄？希望為觀眾留下深刻印象，大家諗起郭富城演過一個好出色嘅孫悟空！係有啲味道喎！」然而，拍畢《女》片後，城城亦為喜劇着迷，全因角色輕鬆又充滿幽默感︰「戲中苑瓊丹、大潘（潘斌龍）都是喜劇演員，面對佢哋好好玩，好多嘢即興加兩句，喜感就出！」他更稱自己其實好好笑︰「我希望為將來鋪路，日後拍多啲喜劇，明年賀歲都想拍呢類電影，角色人物可以多啲變化！」

導演爆唐僧要墮胎

鄭保瑞第三度執導《西遊記》系列，他說要將《女兒國》拍成愛情喜劇有難度︰「以前《西遊記》系列較少接觸愛情範疇，今次拍唐僧四師徒闖入女兒國，與國王有感情關係，除了要大肚，又要孫悟空幫師傅搵墮胎水，但我沒打算推翻《西遊記》，始終要考慮觀眾接受程度，因為大家都知結局。」

服裝︰IT

髮型︰Ian Wong@ii Salon

化粧︰Terry Yu

場地︰帝樂文娜公館DaDa Bar

撰文︰Steven

編輯︰黃卉彤

美術︰李明

攝影︰林良明