跟足過年習俗 馬明紅底褲當護身符

馬國明和蔡思貝在台慶頒獎禮雙雙獲得最受歡迎電視男、女角色獎，昨日二人現身商場新春活動。馬國明自言多年來都會跟足傳統，在過年時陪媽媽買桃花、年初一午夜食齋，還會買紅底褲放櫃桶等。

馬明自爆買紅底褲的新年習慣，他說︰「年年都有，但無着，只係放櫃桶底，收埋好多條新底褲，好似護身符咁。（擺咗好多年？）都幾年，除非畀蟲咬爛啦！」

《降魔的》眾演員前晚搞慶功宴，馬明被發現不敢全程睇「華姐」，他說︰「我個位背住電視啫，我又掛住食，（有無睇到黃心穎？）都有望兩眼，佢做評判嘛。（係咪心穎靚過啲華姐？）每人審美眼光唔同，各有各靚啦。」

對於有報道指馬明慘被心穎「榨乾」，馬明解釋只是呻窮︰「跟心穎出街都係輪流畀錢，我請食飯，佢就請睇戲。（影到你去車行，係咪換車？）我只係定期車檢，無買車。」情人節將至，馬明指兩人都忙於工作，相信未必有時間慶祝。

思貝同麥秋成關係不變

明天27歲生日的思貝，她希望更專注事業發展，問到她與麥秋成的關係，思貝點頭承認關係不變，但只肯形容彼此是「好朋友」。身旁的馬明聞言後衰多口笑謂︰「27歲？我生得你出喇！（你女友心穎咪差唔多年紀！）我哋唔係睇年紀嘅。」

採訪︰Pauline

攝影︰林良明

編輯：林梓添

美術：招潤洪