熱血街舞劇 反思一念之間的決定

讀書時期嘅黛安都成日遇到唔少煩惱，所以不時都會搵身邊朋友傾訴。協青社今年就以「一念之間」為題，舉辦街舞劇，希望青少年遇到困難時「停一停，想一想」，同時都要識得搵朋友或者社工開解。

身兼項目統籌、執行監製暨劇本創作及YO執行委員會委員紀文鳳就話，面對煩惱困難，人人平等，希望青少年知道「一念天堂，一念地獄」，遇到困難時「停一停，深呼吸，想一想」，相信難關總會過。佢又話，每個人都可能承受各方面嘅期望，希望大家從劇中明白「得唔得都得」，唔好因未能達成期望而失去自信。

其實黛安一直都好欣賞YO協青社嘅理念，佢哋一路緊隨青少年需要及潮流文化轉變，以創新、機動嘅方式，主動接觸邊青，多年來以街舞活動作為介入點，幫咗好多高危青年學識正面對待難題，鍛練堅毅嘅精神，真係好值得支持！

街舞劇《一念之間》會係4月14日分下晏同夜晚兩場上演，其中下午場係慈善演出。想知道劇入面主角點樣喺一念之間改變諗法，跨越困難，就記得買飛入場啦。