雞年消費新聞 機票超賣最受關注

平時黛安得閒就會約埋一班好姊妹去Shopping，對於消費新聞向來好關心，每年由消委會、《晴報》、《香港經濟日報》、《TOPick》等多家媒體合辦嘅消費新聞選舉，黛安都會去投票㗎。

噚日「雞年十大消費新聞」選舉結果揭盅，唔經唔覺活動已踏入第14年，消委會主席黃玉山教授同黛安講，今次總共有4,729人投票，人數創新高，反映咗大家真係愈來愈重視自己嘅消費權益。

今次十大消費新聞排頭3位就係「HK express旺季取消18航班，至少2,000名旅客受影響」、「巴西『黑心肉』肉商曝光，數間連鎖食肆受影響」以及「聯合航空強行逐客，全球關注超賣機位問題」。

香港人無論淡季、旺季都鍾意去旅行，今次排第1同第3位嘅消費新聞，都同航空公司有關。黃玉山教授都話，呢兩宗新聞喚起咗公眾關注航空業超賣機位同廉航管理營運嘅問題。

黛安仲記得去年網上瘋傳聯合航空將男乘客強行拖離機艙嘅影片，相信唔少人對呢件事都記憶猶新，呢單新聞仲當選埋「最離譜」消費新聞，黛安都覺得實至名歸！