尖東6大廈 閃耀燈飾賀新春

香港嘅夜景，黛安覺得係全世界最靚，每逢聖誕、新年都一定會同屋企人去睇燈飾。今年新春，東尖沙咀地產發展商聯會主辦嘅「閃爍尖東耀香江」踏入第35屆，繼續為大家送上光芒四射嘅暖意！

東尖沙咀地產發展商聯會主席邱文華話，30幾年嚟，尖東璀璨燈飾見證香港發展，亦係幾代香港人嘅集體回憶，每年為繁華尖東添上歡欣氣氛。今個農曆新年當然唔例外，富豪九龍酒店、帝苑酒店、南洋中心、永安廣場、帝國中心同尖沙咀中心6座大廈，繼續為大家送上最真摯祝福！

佢介紹，其中南洋中心兩座外牆會用小孩同今年生肖主角小狗做主題，而尖沙咀中心嘅LED多媒體幕牆，會播放花開盛放、燈籠高升、賀年揮春同漫天銅錢嘅繽紛畫面，好精采啊！