本周有農曆新年外加情人節，要同時滿足家人與愛人，堪稱世紀難題。亳無頭緒，何不以甜蜜蜜美食俘虜人心？今次有高質煙韌千層班戟、甜到入心的心太軟，還有至Hit韓食及另類魚宴，與摯親大飽口福後更可齊齊開心到區內的沙咀道遊樂場逛年宵。
$42 紫薯千層班戟（Sweetheart）
一提到Sweetheart，相信大家一定會想到愛人。不過Sweetheart老闆阿健的「Sweetheart」，大概是對他無條件支持的家人。阿健一向從事物流，和絕大部分上班族一樣，有穩定的工作，定期發薪水。開店的念頭，源於當時老闆的一絲啟發︰「嗰時老闆同我講，其實呢份工你係可以做一世嘅，但你唔好預會升職，一做就做到老。當時太太有咗，自己都反思，唔通我一世就咁咩？」帶着一絲的不甘，阿健毅然走上創業路，選擇賣自己從小就偏愛的甜食。
從打工到創業，作為爸爸的阿健自言是成長。家人亦身體力行相當支持，阿健的家姐、姐夫、爸爸常到店內幫忙，採訪當日就有家姐在廚房幫忙，姐夫充當樓面，對於家人的付出，阿健坦言「好感激」。溫暖的又豈指樂也融融的一家，小店前身為士林街心記，搬店後改名為Sweetheart，由外賣店變身成堂食店，店內招牌依然是暖笠笠椰皇燉蛋白，油麻地果欄新鮮椰皇燉蛋白，採用濃滑北海道3.7牛乳，椰香配蛋白及奶香，暖到入心。不過原來椰皇每年有1-2個月供應期不穩定，於是就衍生了本店獨有的椰青燉蛋白，味道更清香，分量更澎湃。
店內更有賣大熱千層班戟，口味多多，香甜紫薯、清新蜜糖青檸等，採用法國忌廉，味道更香；蛋皮即叫即製，全人手製造，透薄、煙韌、彈牙，蛋糕不足9cm，就有足足24層蛋皮，十分足料。
Sweetheart
地址：荃灣鱟地坊8號卓明大廈地舖
電話：6848 1247
營業時間：星期二至日，2pm-12nn，星期一休息（公假除外）（11:40 Last order）
$30 脆脆華田心太軟拼雪糕（SJ Burger）
節日少不了和家人溫馨度過，或與情人甜蜜過節，不過又怎能少了男人的浪漫呢？每班真巴打都一定有講過要一齊創業，最近就有成功故事出現在荃灣鱟地坊，為一班想一齊做生意的弟兄打打氣。
作為專業掃街達人，一定去過有「荃灣士林食街」之稱的鱟地坊，好西種類在這裏應有盡有，幾乎想得出的都可以在裏找到，熱狗、手抓餅、玉子燒……最近又有好西登陸食街，掃街精又有新嘢掃！SJ Burger小小一間店，內有Homemade甜品與Burger，短短4個月，已儲下不少捧場客，更成為小店老闆Sam、Justin與一班老死的聚腳點。
Sam與Justin是中學同學，別看兩人年紀輕輕，他們一個在酒店做甜品師傅8年，一個做了10年西日廚師，兩個好巴打一手包辦店內出品，兩人同樣有着獨有的技巧及執着。
Sam笑指︰「其實當時做咗8年都會唔捨得，不過唔試下開舖又會遺憾。」由他包辦的甜品款式貴精不貴多，幾款已足夠成為大家心中的經典。最出位的有脆脆華田心太軟，價錢吸引，驚喜之處在於流心加入華田脆脆，流心除了朱古力，亦加入了華田口味，雙重華田味甜到入心。
至於Justin，訪談間不難感受到他對食材的執着，以店內至Hit的美國安格斯牛肉漢堡為例，他就選用100%安格斯牛的牛肩肉，堅持不嗌貨，入一大塊自己碎、自己磋，他指︰「咁比較易控制，出面嗌貨你唔知佢畀牛嘅邊個部位你。」
SJ Burger
地址：荃灣鱟地坊80-84號華成樓B座地下B4號舖
電話：5108 0755
營業時間：星期一至日，11:30am-10:30pm（16/2，年初一休息）
$42豬肉粉絲卷拼紫菜粉絲卷（韓閣）
韓菜是情人節大熱之選，一家人新春吃中菜吃到厭？不坊一嘗另類菜式。可惜韓菜愈來愈濫，質素更愈來愈參差。荃灣新開的「韓閣」卻是韓迷必攻陣地。
老闆娘Christine不是飲食界新丁，過去數年曾開過數間飲食集團加盟店，經驗豐富。小店環境走工業風，水管及彩色玻璃瓶製成的吊燈、紅磚牆，四邊都裝了鏡子，為二、三百呎小店加了空間感；全天候播放K-pop，形象年輕新潮。她更趁裝修期間，與弟弟一起赴韓國學藝個多月，在韓國朋友家人開的菜館做幫工，每天跟隨大廚到街市買菜、入廚。「日日五六點就要起身，做到夜晚十點幾，幾辛苦，不過就學到好多嘢。」掌廚的弟弟Irwin說。
餐牌上三、四十道菜式，7成傳統，3成新派，樣樣做得不錯，尤其傳統的，辣得有層次，不是一味死辣。「做韓國菜最緊要係醬汁，雖然來來去去都係用幾種材料做，例如辣椒醬、蒜頭，但比例要調校得好好。另外唔好走捷徑，韓國菜以甜辣為主，好多時會用到黄糖或粟米糖，唔好用白糖代替，無咁甘。」Irwin說。
韓閣
地址：荃灣路德圍運通街地下10M號舖
電話：3956 8101
營業時間：星期一至日，11:30am-11pm
$62 意式炸銀魚（Catee）
世上沒有不吃魚的貓，也沒有不愛美食的人。為食貓想吃魚，不一定要去中式海鮮小館。Catee主打西式魚料理，用上龍躉、龍脷、三文魚等，本地街市或飛機貨不拘，總之都是新鮮好貨源。翻開餐牌，小吃、意大利飯、主菜等約40款，由有30多年經驗、曾於酒店西餐廳工作的大廚良哥主理，有水準、有特色。
我們對西式做法總有諸般誤解，不是覺得太貴，便是覺得調味過重，又煎又炸，「浪費」了魚鮮。老闆之一Rem指「呢個諗法係有偏見，如果用意大利和美式，加少少創意做魚，其實本地客人都好受落。最緊要貨源夠鮮夠靚！」。
幾位年輕老闆想說服客人改變主流想法，於是選擇從餐廳主題入手。「復古工業風雖然有型，客人普遍受落，但始終欠缺鮮明印象，於是諗到用愛食魚嘅貓做主題。」老闆Rem解釋。這裏掛畫海報處處都是擬人化的貓，掛畫海報、法式花磚等，都印上了不同的貓人，如紳士、淑女、Band友等，配上背景的輕爵士樂，滿有個性和品味。
Catee
地址：荃灣楊屋道73號地下
電話：2776 1328
營業時間：星期一至日，11:30am-3am
撰文︰何美澄
協力︰Carol
攝影（部分）︰林良明
插畫︰何樂
編輯︰余運慶
美術︰招潤洪