人日送暖 誠哥向老友記拜年 捐千萬助惜食堂

噚日係農曆正月初七「人日」，人人都生日快樂啊！20位百佳義工，噚日就去咗深水埗惜食堂同長者拜年，人稱「超人」的李嘉誠更以李嘉誠基金會主席身份驚喜現身，大派生果同白米之餘，更即場捐出$1,000萬，真係出錢又出力啊！

自稱「90後」 談笑風生

黛安知道，百佳係第一家捐贈可食用剩餘食物嘅超市。公關姐妹話，噚日百佳義工喺屈臣氏集團董事總經理黎啟明及首席營運總監倪文玲帶領下，一齊去到惜食堂社區中心向長者送暖，即場準備熱飯餐，又派禮物包，善心滿瀉。當大家準備得如火如荼之際，誠哥突然出現，現場所有義工同長者都非常驚喜。

誠哥首先就向長者拜年，祝願大家身體健康，萬事順心如意，又大派生果同白米。即將步入90歲嘅佢仲講笑話自己就快係「90後」，引到班老友記笑到見牙唔見眼。之後佢坐低一齊食飯，品嘗三餸一飯，大家有傾有講，場面非常溫馨。

惜食堂共同創辦人高小雲提到，過去6年以百佳捐出食物，服務接近400萬人次，好感謝誠哥對惜食堂嘅大力支持。誠哥聽完之後好開心，仲當場以基金會名義，捐出$1,000萬畀惜食堂擴展社區服務，又話將來會有更多撥款支持本地唔同嘅社企同機構，一齊建設善愛社會，真係善心爆棚呢！