Audrey Ng
Audrey Ng

點解生完仔即想出院?

發佈時間: 2018/02/26

點解生完仔即想出院?

「做人阿媽甚艱難。」未做過人阿媽,又點會明白呢句說話嘅含義?

話說我痛咗近20個鐘,終於「卸貨」成功。嗰一刻,真想大叫一聲︰「大功告成!」幾近虛脫嘅我,第一個念頭當然希望好好瞓一覺啦!之但係,喺公立醫院生完仔想休息,可謂天荒夜談。

點解我咁講?事緣公院近年為鼓勵母乳哺育,喺產科實施「愛嬰醫院」政策,呢啲政策包括安排「母嬰同室」,等媽媽全天候24小時與BB共處,多啲肌膚之親,一方面畀BB學習吸吮乳頭,另邊廂,媽咪亦可練習餵奶、換片等。

不過你都想像到啦,新手媽媽照顧初生BB,談何容易?起初,當姑娘將洗完白白嘅囝囝抱到我身邊,真係百看不厭。但幾個鐘頭過去,見到個囝嗌破喉嚨係咁喊,就算個B幾得意都會覺得攰啦!「頭先明明瞓着,點解一放落床就喊?」「已經換咗尿片啦喎,依家仲嘈乜嘢?」救命,有無人可以幫下我?

其實每位媽媽床頭都有個掣,有需要可「撳鐘仔」搵姑娘幫手。有一次,我發現BB喊聲有啲異常,於是撳鐘求救,但就畀醫院姐姐話︰「BB梗係會喊㗎啦!如果個個都好似你咁撳鐘,我哋咪好唔得閒?」Ok fine.惟有用自己方法試下安撫BB。又有一次,半夜太攰,由得BB喊咗陣,點知就畀姑娘拍醒我︰「你個B係咁喊喎,搞搞佢啦!」結果當然又無得瞓啦。

如是者,做人阿媽頭2日,我終於體會咩叫「眠乾睡濕」;無得瞓之餘,乳頭亦因為唔識餵奶畀阿囝咬損咗,真係心力交瘁。當時我只有一個心願,就係希望盡快出院,交個B畀屋企人,然後好好瞓一覺。

(本欄逢周一刊登)

撰文: Audrey Ng 80後P牌媽咪,由懷孕280天起分享陀B湊仔歷程
欄名: B經之路