林鄭「深井光屋」探住客 齊食開年飯慶新春

社企「要有光」推行共享房屋已有一段時間，幫咗唔少有住屋困難嘅基層家庭。其實政府同「要有光」首個合作項目「深井光屋」，係特首林鄭月娥任政務司司長時促成嘅項目！黛安收到風，噚日特首林鄭月娥就同勞福局局長羅致光一齊去咗「深井光屋」探下一班住客，仲同佢哋一齊食開年飯呀。

「深井光屋」原本係工廠員工宿舍，係閒置嘅政府物業，翻新後就搖身一變成40幾個租住房屋，以低於市價嘅租金租畀基層家庭。林鄭之前已經去探訪多次，見到唔少居民喺光屋居住期間，家庭情況逐步改善，加上專業社工輔導同鼓勵，唔少家庭都重新起步為未來奮鬥，林鄭都話好開心！

噚日林鄭仲同一班街坊喺天台打邊爐，仲即場收割居民喺天台農圃種嘅生菜，齊齊「撈起」，真係夠晒好意頭！黛安都祝一班街坊，新一年事事順景，風生水起！