新片口碑贏偉仔 劉嘉玲︰佢去呃小朋友啦

由劉嘉玲、任達華主演的賀歲片《我的情敵女婿》，上映十日票房報捷，電影公司前晚舉行祝捷會，並宣布明年原班人馬再合作。有份參與的演員包括衛詩雅、唐詩詠及麥明詩等聽到好消息也拍手支持。

任達華自言開拍續集的話不介意充當製片，熱愛旅遊的他更提議可以環遊世界進行拍攝。「依家環遊世界機票好平，可以去勻荷蘭、紐約、英國等地拍攝，我哋寓工作於娛樂。」在旁的嘉玲直言與華哥合作很有默契，而且有安全感，絕不介意再合作。二人今次合作已相隔25年，問到下次是否要再等25年？嘉玲笑謂︰「再等25年我差唔多80歲啦！」

詩詠唔知舊愛有無撑場

有指《我》片好笑過老公梁朝偉演出的《捉妖記2》，嘉玲高興謂︰「我去行山見到唔識嘅人，都話睇到好開心。可能我哋部戲有香港情懷，偉仔嗰部就啱內地同小朋友口味多啲，（偉仔曾經話自己拍喜劇好笑喎！）依家證明唔係啦，佢去呃小朋友啦！不過人哋都收19億（內地）票房。」

另外，唐詩詠表示睇了《我》片兩次。問她可會跟朋友再入場睇第三次？她說︰「叫佢哋再去睇。（洪永城睇咗未？）唔知。」

撰文︰Pauline

編輯︰林梓添

美術︰梁政敏