長沙灣 孖生姊妹手作料理

長沙灣集輝街附近都係工業大廈居多，但最近有間低調小店開業，睇格局會以為是Cafe，但揭揭餐牌，由麵食、三文治、咖啡、一夜乾及烤雞樣樣都有，分分鐘讓大家的「選擇困難症」發作呢！

原來舖頭由一對孖生姊妹Jessica及Joey開設，她們分別是護士及空姐，因為愛煮所以開店，所以餐牌不拘一格，將自己擅長做的都放到餐牌上。雖然不是做飲食業出身，但Jessica一向有做歐式包，更跟過台灣麵包大師楊世均學做包，至於Joey則曾跟從法國廚學藝。

Homemade醬汁

舖頭賣點是90%手作，例如麵包，Jessica用法國麵粉加「老麵」（Dough Starter）手搓手製，低溫發酵24小時而成，加「老麵」及低溫發酵令包子只焗30分鐘已呈深啡色，小麥香突出，會拿來做三文治，也會單個發售。

店內的雞卷、豬頸肉、烤雞、一夜乾、餃子都由零做起，醃肉的醬汁及淋面的辣椒油是Homemade，湯麵用的蝦湯及蟲草花羊肚菌湯都是自家煲，前煮用半煲蝦頭煮，後者以羊肚菌乾及蟲草花加骨頭煲3小時而成，原材料都是新鮮的，無味精又少油，有少少食住家飯Feel，不過再Fine一點。

雙生館

地址︰長沙灣集輝街2-8號耀輝大廈地下3號舖

電話︰6060 9834

營業時間︰9:30am-10pm

平均消費︰午市$50、下午茶$40、晚市$150

編輯︰余運慶

美術︰招潤洪