黛安
黛安

星晨搵達人幫手 打造獨特旅遊體驗

發佈時間: 2018/03/01

星晨搵達人幫手 打造獨特旅遊體驗

噚日《財政預算案》,財爺慷慨派糖,黛安就打算用退稅慳到嘅錢去旅行。咁啱星晨旅遊CEO阿Sam(馬冠禧)有好介紹!原來佢最近搵咗四位旅遊達人,成為旅行社旗下嘅「星晨達人」(SOL),噚日仲畀咗好多嶄新旅遊資訊黛安。其中自稱「Dry爆人妻」嘅 Candace笑言,最近同閨密好友去泰國玩,仲發現咗幾個新景點。當中不得不提位於曼谷嘅「猛男夜市」Hua Mum Market,入面除咗多嘢食又多嘢買,仲有間海鮮店以猛男waiters作招徠,令佢哋忍唔住搵猛男打卡。想知佢仲去咗邊度玩,可留意星晨達人專頁,其餘三位SOL亦會喺上面分享旅程點滴㗎!

此外,阿Sam同黛安講,今年星晨仲會推出多種以「邊酒邊主」、「星級煮意」、「修身禪行」等主題嘅特色旅遊體驗,希望令旅客搵番旅行嘅初心,唔好再覺得跟團係做「鴨仔」。噚日星晨仲推出全新嘅「星多拿Star Dollar」積分兌換計劃,大家購買星晨嘅旅遊產品就可獲得積分,用來兌換UA電影戲票,積分仲可與易賞錢及The Club等互換。可以跨界別咁兌換,玩法真係非常破格呢!

撰文: 黛安 消息特靈八卦公關
欄名: 八卦名利場