家燕姐笑罵坤哥口花花

許廷鏗與胡鴻鈞被踢爆同遊冰島睇北極光，吳業坤（坤哥）日前抵死表示呷醋，可能好事近。坤哥昨日到新城電台接受薛家燕訪問，更即場被家燕姐「教訓」，叫他不要成日口花花。

吳業坤到電台宣傳新歌《凱旋門》，他指早前到巴黎拍MV，在酒店房睡覺時感到「被鬼壓」，還笑言因為沒與家燕姐結伴同行。問他是否覺得家燕姐可以闢邪？坤哥笑謂︰「家燕姐旺嘛，年初二我去黎小田作品演唱會搵家燕姐。」家燕姐亦搞笑表示︰「我一打開門就見到佢，幾想唱句『心肝寶貝，突然在眼前』。」

願意做媒人

坤哥解釋演唱會當日來去匆匆，未有跟黎小田打招呼，只離遠向台上的黎小田揮手。家燕姐提醒他要給人留下好印象，坤哥更認衰表示︰「我返唔到轉頭，因為成日撩你。」家燕姐笑言曾經勸坤哥不要成日口花花，又說想介紹女仔給他，話口未完，坤哥又稱︰「珊珊（薛家燕大女石祐珊）？電話都已攞埋！」家燕姐即嚇到再次教訓他︰「情場嘅嘢，要慢慢嚟，你唔好咁多心。」

撰文：Pauline

編輯：陳禮恒

美術：梁政敏