黛安
黛安

越南最好味 錦麗牛肉粉 銅鑼灣開分店

發佈時間: 2018/03/02

越南最好味 錦麗牛肉粉 銅鑼灣開分店

想食正宗越南牛肉粉,唔一定要飛過越南嘅。就好似太興旗下T-Factory舊年引入越南超人氣牛肉粉品牌「Pho Le錦麗越南牛肉粉專門店」,短短一年,第5間分店即將登陸銅鑼灣世貿中心,認真多粉絲支持。

黛安同T-Factory總經理陳家強(Tommy)傾開計,佢話頭4間分店分別喺觀塘APM、九龍灣德福廣場、將軍澳東港城及大埔超級城,新分店係港島區嘅第一間店,港島區客人日後唔使長途跋涉過海歎碗靚粉。新店裝潢已七七八八,預料3月底或4月初開幕。

蔡瀾讚不絕口

錦麗越南牛肉粉曾經獲國際媒體《華爾街日報》譽為越南胡志明市最好吃牛肉粉,香港著名食家蔡瀾同葉澍堃對呢種美食都讚不絕口。為學得最傳統做法,Tommy曾4次同一班香港師傅到胡志明市「集訓」,向錦麗老闆拜師學藝,將最原汁原味湯底帶返香港,更四出考察,尋找新靈感。

其中最令黛安垂涎三尺嘅一定係「錦麗綜合粉」,Tommy話,綜合粉係用上優質澳洲肉眼生牛肉,預先將本地牛坑腩炆煮至軟腍,仲有爽口彈牙嘅牛丸。除牛肉湯外,更加上牛肉湯嘅精華—「牛湯油」,成碗牛肉粉即時「升呢」,倍添濃厚牛香,馥郁可口。黛安從來唔會「自私食」,已經同幾個閨密去食過幾次了,你都快啲去試啦!

撰文: 黛安 消息特靈八卦公關
欄名: 八卦名利場