黛安
黛安

元宵逛利東街 感受「情藝愛漫遊」

發佈時間: 2018/03/02

元宵逛利東街 感受「情藝愛漫遊」

3月份香港嘅藝術活動真係遍地開花,除咗藝術月多個展覽活動外,仲可以行下利東街!黛安最近發現利東街嘅出入口同埋中間位置嘅3層行人天橋,都多咗色彩繽紛嘅流綫型圖案大型藝術裝置,令人眼前一亮!公關姊妹同黛安講,原來呢啲藝術裝置係出自國際藝術家辛塔坦達雅(Sinta Tantra)手筆,主題係「情藝愛漫遊」,再配合利東街嘅嫁囍歷史背景,營造出浪漫嘅感覺。

黛安知道,出生於紐約嘅辛塔坦達雅,除咗喺2012年獲邀為倫敦金絲雀碼頭長達300米嘅大橋添上奪目圖案外,去年仲獲羅馬英國學校頒發「布里奇特萊利繪畫獎助金」,藝術成就備受肯定。黛安趁住今日元宵佳節,同男朋友去感受一下浪漫氣氛!

撰文: 黛安 消息特靈八卦公關
欄名: 八卦名利場