花劍王子張家朗 為保育海洋「走塑」

塑膠垃圾問題影響全球海洋生態，噚日香港海洋公園保育基金就舉辦咗「生態保衞賽」慈善跑，希望提高大家對海洋保育嘅關注。

活動共吸引1,800名跑手參加，黛安都去咗科學園湊熱鬧，「花劍王子」張家朗、羽毛球名將「黑妹」葉姵延及港隊舉重代表鄔謨雲等都有現身支持。

噚日第一次參加生態保衞賽嘅張家朗話，賽事中「危機四伏」，有大型充氣障礙物阻住參加者，藉以表達海洋垃圾問題嚴重，海洋生物有機會誤吞塑膠碎片，「大家都要注意唔好貪方便而用即棄塑膠產品。」

保育基金主席陳晴亦分享，好高興愈來愈多人響應加入保育行列同減塑，好似舊年嘅無飲筒日就有好多機構支持，浸會大學仲成為首間無飲管大學。黛安聽到都覺得香港人好犀利！