Shine紅館騷 Twins讚天佑激似城城 粉絲︰80後千禧回憶

男子組合Shine一連兩場紅館個唱前晚落幕，兩子除了騷肌兼作高難度表演外，尾場獲Twins任嘉賓，阿嬌更大讚天佑的外貌似足郭富城。不少粉絲指集體回憶返晒嚟，高呼二人若再開騷，必定買票捧場！

繼12年徐夕在紅館舉行跨年騷後，Shine相隔五年多再度合體舉行兩場個唱，頭場獲楊千嬅、許志安任嘉賓，而尾場則有同期出道的Twins、at17等助陣。兩子於02年曾與Twins合作電影《這個夏天有異性》，15年尾Shine現身紅館當Twins個唱嘉賓，今次Twins投桃報李，兩大80後組合演唱Twins的名曲《明愛暗戀補習社》。四人在台上齊齊話當年，又南更玩踢爆︰「阿Sa話佢哋（Twins）落車時，我哋無同佢打招呼！」阿Sa聞言表現尷尬，寸爆對方心胸窄及記仇，反觀身旁的阿嬌強調不知此事。

預告外地開巡唱

然而，阿嬌亦醒目指34歲的天佑樣子好似郭富城，阿Sa更戲言天佑今日（前晚）比城城靚仔，自爆初戀男友與天佑好似樣，她並稱︰「即係我初戀男友似郭富城？」

此外，天佑與又南在兩場個唱也施展渾身解數冧觀眾，又南赤膊大跳鋼管舞，天佑亦半裸上陣耍雙截棍，加上大唱多首經典歌《燕尾蝶》等，令不少80後樂迷聲言睇足兩晚都唔夠喉。完騷後，Shine受訪時直認要能否研究開Part 2，可能在其他地方作巡迴演出。

撰文︰Steven、Pat

協力︰阿瑤

編輯︰黃寶恩

美術︰梁政敏