下月搭的士 可以用八達通畀錢喇！

黛安仲記得，特首林鄭月娥舊年喺《施政報告》中提出向市民提供交通費補貼，成個辦公室嘅人都即刻埋頭計算自己可以得到幾多津貼，仲好期待呢項措施𠻹。噚日黛安同八達通CEO張耀堂食飯，佢話會積極向村巴、紅色小巴同的士推廣八達通支付系統，仲話下月將有首批的士接受八達通拍卡畀錢𠻹！

張耀堂話，依家公司推廣緊商用版O！ePay手機App，商戶可透過設有NFC功能嘅手機讀取客戶嘅八達通卡收費，毋須安裝八達通讀卡器。呢種模式較適合小商戶同的士，期望下個月會有首批的士提供呢種付款方式，仲話「再戰的士」係公司今年工作重點之一！對於金管局9月推出快速支付系統，佢話會有利八達通卡商戶把收帳款項即時轉帳至其銀行戶口，仲方便的士司機大佬收款𠻹。

增設服務點 領交通津貼

佢仲話，未來會增設服務點，畀市民拍卡領取政府嘅交通費補貼款項，仲研究喺便利店同超市合作設置相關服務，同埋畀市民喺手機自助領取補貼，公司亦會增聘人手，設服務熱綫解答市民關於領取補貼嘅問題。「220萬人受惠嘅政策，預計打入來嘅人不少」，真係好貼心呀！

講開星期四就係三八婦女節，八達通會同香港街市旗下馬鞍山恆安市場合作推出活動，凡喺本月8至15號期間，喺恆安市場指定8個商戶憑O！ePay手機App以QR Code付款，就可以$8買到龍蝦、肉眼扒等限量優惠產品，勁吸引！