何嘉莉復出幕前做KOL

已為人妻兼媽咪的前歌手何嘉莉，早前重返「娘家」英皇，不過今次不再唱歌，反而做KOL分享扮靚心得。她指今次「復出」會一邊湊仔、一邊適量工作。

何嘉莉前晚在錄影節目《流行經典50年》唱了兩首歌，問到面對鏡頭獻唱可有生疏？她表示︰「上次唱歌係四、五年前嘅伍樂城演唱會，其實自己平時都有唱K，但係就唔會歌癮起。」

提到嘉莉簽約舊公司英皇做KOL，是否真的不打算再做歌手？她說︰「今次同公司簽KOL約，覺得好適合我，可以邊照顧小朋友，邊拍嘢。」在去年誕下囡囡Zoe的嘉莉，提到女兒一臉幸福，她更表示平日有機師老公和媽咪幫手照顧小朋友，加上她大部分時間都留在家中工作，照顧小朋友絕對無問題。

《流行經典50年》再添食

古巨基在節目內擔任客席主持，身為主持的薛家燕對他讚不絕口，又指基仔有豐富主持經驗，加上他有多首經典金曲，可謂對節目錦上添花。家燕姐又自爆黎小田搞到節目差點不能添食。「小田話辛苦，佢之前又話會養我一生一世，但一生都未完佢就話唔做，所以佢早排開演唱會，我當住觀眾面前問佢仲做唔做，佢先肯繼續，依家個節目可以做到六月。」

撰文︰Pauline

編輯︰林梓添

美術︰梁政敏