蘭桂坊歎藝術料理 聽創意音樂會

嚟緊嘅復活節假期，唔知大家有plan未呢？黛安就plan咗去蘭桂坊第3屆嘅Savouring Art展覽，今次由著名塗鴉藝術家André Saraiva主場，聽講佢嘅作品喺全球出現過超過30萬次，非常期待啊！

贏三藩市來回機票

活動噚日喺加州大廈Loft 22揭幕，由蘭桂坊之父盛智文（Allan）同囝囝盛凱一齊主持。Allan話蘭桂坊一直好支持本地藝術發展，今次希望將藝術帶到餐廳，吸引世界各地嘅旅客。公關姐妹話活動期間會同12間頂尖餐廳合作，推出多款藝術創意菜式，望落賞心悅目，黛安見到都唔捨得食。

仲有，最吸引嘅係莫過於係今個月1至31號，嚟展覽會影相兼上載到IG，再加「#LKFSavouringArt」同「#EdibleHappiness」，即刻有機會贏得香港至美國三藩市雙人來回機票！

最近蘭桂坊精采節目多籮籮，除咗搞展覽，仲聯乘騰訊旗下免費音樂平台JOOX，推出《JOOX COLLECTIONS︰Private Stage @ LKF》創意音樂會系列，第一場就係用咗無聲演唱會嘅Idea，仲搵咗本地人氣樂隊Supper Moment打響頭炮！黛安眼見現場無任何大型喇叭，全場都戴住耳機收聽樂隊演繹嘅原音，場內每個角落都可聽到同樣優質嘅表演，突破傳統音樂會嘅框框。公關姊妹講，JOOX嚟緊一連12個月，每個月都會同唔同本地音樂單位合作，記得密切留意JOOX fb贏取門票！