黛安
黛安

心晴市集開幕 曾俊華鼓勵「發呆」減壓

發佈時間: 2018/03/07

心晴市集開幕 曾俊華鼓勵「發呆」減壓

香港人生活壓力大,真係要多啲關注情緒健康。黛安知道「心晴行動慈善基金」一向都好關注情緒病,最近由佢哋營運嘅首個社企「心晴市集」,喺港鐵天水圍站正式開幕!公關姊妹同黛安講,市集主要係以優惠價賣由名人明星同埋熱心人士捐出嘅衫。

「前財爺」曾俊華仲特登帶埋老婆同女一齊出席揭幕儀式,佢仲自爆自己鍾意發呆,認為可以減壓,仲唔只1分鐘𠻹,「會係好長時間!我好鼓勵家長畀小朋友多啲發呆時間,可以增加思考。」佢仲為關注情緒健康嘅人獻計,其中包括修改學校課程,協助老師教學生包容嘅意義,自細培養同理心,同埋鼓勵老闆培訓員工認識情緒健康,傳媒亦要正面處理情緒問題題材嘅故事,黛安喺現場都獲益良多!

撰文: 黛安 消息特靈八卦公關
欄名: 八卦名利場