開飯喇

發佈時間: 2018/03/13

開飯喇

4天前

有誠意又有創意,自然得人鍾意。

星期六晚到法國餐廳Tate Dining Room & bar,欣賞了亞洲最佳女廚師Vicky Lau的中西結合料理藝術,八道菜加一杯香檳一紅一白pairing,整個氛圍、擺設和味道都優雅精緻,令大家非常滿意。

印象最深刻的是用紫菜、昆布牛油及雞汁煮成的risotto,放上由大連新鮮運到的鮑魚切片,非常考究。我自己最愛的是甜品︰前後用了三日工夫,將柑橘肉慢煮成汁,再用來煮軟柑橘皮,內藏小丸子、蜜餞和Chiboust雪糕,質感非常特別;旁邊放了幾片日本葉,名字竟叫做「藍天」,真有詩意。最玩嘢的是最後一道甜品Ode to Bees︰恍如蜂蜜罐的木器皿,從內播放着蜜蜂嗡嗡聲,逐層揭開是紅菜頭軟糖、紅桑梅海綿蛋糕和白朱古力蜜糖塊等等,帶來一個令人驚喜的ending。

Vicky是潮州人,所以在法、日元素中加入一些潮州食材touch,都幾新奇又好味。我向來後知後覺,幸有一班朋友識飲識食識使錢,帶我見識世面。

1天前

有誠意但缺創意,一樣好得人鍾意--母親大人,我們的屋企總厨。

逢星期六、日返父母屋企食飯,來來去去都指明要食嗰幾味︰冬菇剁豬肉、粉絲蒸水蛋、番茄薯仔湯……連黃亞媽都忍不住話︰「你悶唔悶啲呀!」對屋企飯從來不要求創意,偏偏食極都唔厭。要知道,家常便飯一點都不平常,首先要屋企總廚身體健康,仍然入得廚房,雖然偶爾錯將糖當作鹽,豉油忘了扭上樽蓋而變酸。其次是可以一家人齊齊坐,食得快樂。這些條件不是你想要就有,非甚麼米豬蓮、富豪飯堂可以預訂得到。

我連煎蛋也搞到七零八落,應該無法接手黃亞媽的鑊鏟。只要一想到這些獨有的家常味道終有一日失傳,飯桌終散,難免失落。

(本欄逢周二刊登)

撰文: Esther Wong TBWA\HK 行政創意總監 廣告天下 純粹些牙
欄名: @實時生活