【聲明】港生活網站並無進行電話推廣活動

新款徽章限量登場 迪士尼粉絲齊掃貨

發佈時間: 2018/03/13
  • 1,000次
    分享

去迪士尼樂園玩嘅重頭戲,當然唔少得交換徽章啦,黛安就好期待後日(15號)起一連4日嘅香港迪士尼樂園「徽章交換嘉年華2018」喇,事關到時會有30幾款新款限量徽章!樂園商品採購副經理兼徽章大使林詠珊就醒咗啲交換徽章嘅小貼示畀黛安,可以同大家分享下!

平時大家可能都會留意到,某啲徽章後面有「LE」或「LR」字樣,詠珊話,原來佢哋分別代表「Limited Edition」同「Limited Release」,通常喺季節性活動期間同埋配合電影或動畫上映時發行,限量發行嘅徽章一定唔會增加供應,所以係特別珍貴!

喺樂園交換徽章,有時黛安都會驚換到假貨,詠珊就教路,要留意徽章背面,有發行年份嘅印章、同生產編號,就係真貨,2009年起發行嘅徽章仲會有米奇老鼠頭壓紋布滿徽章嘅背面至邊緣。

詠珊話,今次活動主題係繽紛嘉年華會,Duffy將會介紹迷倒萬千少女嘅兔仔新朋友Stella Lou出場,仲會邀請其他迪士尼朋友仔一齊參與,會有多款小遊戲系列同首推嘅美食車系列徽章!每個徽章都由一個故事開始,目的係令入場人士明白當中信息。詠珊事前仲每日入場同旅客、徽章愛好者交流,了解佢哋嘅心儀卡通人物或喜好嚟獲取設計靈感。黛安真係好期待見到團隊嘅心血結晶呀!

撰文: 黛安 消息特靈八卦公關
欄名: 八卦名利場