太古廣場變萬花筒 繽紛場景藝術增互動

對藝術有興趣嘅朋友相信都有留意到，太古地產旗下物業經常都充滿文藝氣息，繼太古坊之後，太古廣場都有藝術裝置登場！曾獲泰納獎提名嘅蘇格蘭當代視覺藝術家Jim Lambie，將會喺太古廣場中庭，將兩個成名作合二為一，成為佢最大型的藝術裝置《Spiral Scratch》，令廣場變成全新藝術空間！

黛安最欣賞就係Lambie善用日常生活可見嘅物件嚟創作，好似今次展出嘅成名作之一《The Strokes》，就係用黑白膠帶交織而成嘅漩渦圖案，起伏連綿地覆蓋整個中庭地面，就好似黑膠唱片嘅螺旋紋咁。而《Shaved Ice》就用油上繽紛熒光顏色嘅直梯，由地面延伸到天花，梯間仲嵌咗一塊塊鏡，令色彩、形狀、空間互相交織，企喺中間就好似萬花筒一樣！

藝術裝置會由今個月19號展出至下月8號，黛安真係好期待快啲置身於作品之中！