全城關懷學生日 麥兜都撑

記得早排接二連三發生咗好多學生輕生案，黛安睇見都心痛。香港傑出教育家陳葒校長就因為咁，發起咗「全城關懷學生行動日Roly-Poly Day」，希望大家一齊關注青少年精神健康，行動日仲以三色不倒翁做標誌，象徵「色彩生命屹立不倒」，三隻色包括橙、黃、藍，分別代表家庭、學校同社會。

黛安知道，行動日會喺今個月23號開始，一連3日喺九龍公園廣場舉行，屆時仲會有唔同嘅活動，包括「屹立不倒裝置展」同「色彩生命歡樂墟」，深受大小朋友歡迎嘅麥兜仲特登錄咗條短片宣傳個活動！想支持活動嘅市民，可以去行動日嘅fb page下載不倒翁嘅相，再貼去自己嘅fb或者ig，黛安都即刻叫班姊妹一齊支持下先！