東瀛遊日本鐵道遊 豪歎米芝蓮和食

去日本旅行食玩買到悶？不如試下鐵道遊！黛安知道，EGL東瀛遊噚日同西日本旅客鐵道代表正式簽約，成為海外首間旅行社特許「瑞風」列車專列服務。呢架尊貴列車喺舊年6月正式投入服務，列車有10個車廂，大部分係單人房或雙人房車廂，第七間車廂就係全車最大頂級套房，有齊客廳、睡房及廚廁，公關姊妹仲同黛安講，呢間套房仲大過自己屋企！

東瀛遊今日開始推出「京都祗園祭、鐵道美食6天之旅」，由東瀛遊執行董事禢國全親自帶團，客人會喺車廂上過2天，貴為日本其中一款最貴嘅列車，車上面嘅嘢食都唔馬虎，由米芝蓮三星嘅和食店主理，除咗喺車歎，行程仲會入住豪華溫泉酒店，亦會夜遊日本三大祭典之一嘅祗園前夜祭，感受日本傳統，而整個行程都喺京都，全部景點都係酒店可步行範圍，等旅客舒舒服服旅行，唔使坐車坐到暈！

呢個團將會喺7月10日出發，團費10萬蚊起，禢國全同黛安講，「瑞風」列車只有34個位，喺日本國內一票難求，依家透過東瀛遊去，一買就有得坐，佢相信呢個團開賣1、2日後就會爆晒，黛安見架車咁靚，真係幾貴都想豪一次去坐下！