蜆殼義工探長者 製逾千熱飯盒

助人為快樂之本，香港蜆殼義工隊成日都會走入社區，關懷社會上唔同有需要人士。黛安知道，原來公司管理層都身體力行參加義工活動，就好似喺今個禮拜三咁，佢哋嘅管理團隊同埋一批蜆殼義工，去咗惜食堂九龍廚房，為有需要人士準備咗1,443個熱飯盒，然後又為長者準備晚餐，令在場嘅公公婆婆都好開心。

公關姊妹同黛安講，香港蜆殼嘅管理同埋義工隊已經唔係第一次去惜食堂做義工，每次都合力製作超過一千個熱飯盒，佢哋之所以咁支持呢項義工服務，係因為惜食堂「珍惜食物、減少廚餘」嘅理念，同香港蜆殼支持可持續發展同致力推廣源頭減廢嘅理念一致。佢哋希望幫人同為社區注入正能量之餘，都能夠為可持續發展出力。