樹仁全新研究生宿舍 月租$3800住寶馬山

黛安噚日應邀參觀香港樹仁大學新啓用嘅研究院綜合大樓，最吸引係7樓嘅30間研究生宿舍，單位面積由約150呎至250呎不等，非常開揚，仲有獨立廁所，部分房間仲有海景，大家都講笑話月租$3,800就可以住寶馬山！

樹仁學術副校長孫天倫（Catherine）話，暫時有3類人可入住，包括碩士、哲學博士研究生，同短暫停留嚟開學術會議嘅人士，海外生首年仲會免宿費。講到哲學博士，Catherine話樹仁今年9月係第一次開辦呢個課程，依家仲招緊生，由於學額有限，申請人數都好踴躍。Catherine又介紹咗新大樓嘅多媒體製作中心、混音工作室、全功能視訊剪輯室等。佢話依家學習環境都要與時並進，好似混音室同剪輯室設備，媲美專業級，最多可容納202至232人，並提供出租服務，每日1.2萬元，「係公益價，外面絕對不止」。

而樹仁常務副總監胡懷中就介紹，樹仁嚟緊會投資5,000萬分階段翻新教學大樓同邵美珍堂！