玩轉鬧市 挑戰高空索道 昂坪360VR體驗館

今個周五就開始復活節長假期，各位姊妹諗好去邊度玩未？黛安就有個好節目推介畀大家，事關昂坪360上個月推出嘅全新景點「360VR體驗館」反應熱烈，昂坪360決定延長免費試玩期去到4月20號，逢星期三至日就可以免費試玩，長假期大家有節目啦！

聽番昂坪360嘅公關姊妹講，360VR體驗館推出以來深受歡迎，而家館內暫時有4個VR同多媒體娛樂設施，包括引入全港首套動作偵測式Active VR系統嘅「與胡巴捉迷藏」。呢個遊戲係用上VR室內定位技術，參加者喺戴上VR裝備後猶如置身旺角鬧市，同《捉妖記2》主角胡巴同一眾小妖大玩捉迷藏，遊戲期間仲會有其他玩家同場，好似打機咁刺激！

但講到最緊張刺激嘅遊戲，黛安就覺得一定係「高空索道行」！玩家要化身纜車工程人員，行上高聳入雲嘅纜索，喺限時內解開纏住纜索嘅氣球，令纜車正常運作。雖然腳下係昂坪市集、天壇大佛及寶蓮禪寺等美景，但亦有行駛中嘅纜車，可以話係觸目驚心，真係驚到「個心都離一離」！

唔鍾意太刺激嘅朋友，可以考慮玩「光影許願樹」，將寫上自己願望嘅寶牒拋上樹祈願，願望就會出現喺大屏幕上；或者企喺「百變魔衣櫥」前，着上由國際時裝設計師Vivienne Tam以《捉妖記2》為靈感設計嘅2018春夏連身裙selfie。4個遊戲都咁吸引，而且老少咸宜，黛安真係好期待快啲到假期，同埋屋企人一齊去體驗館玩！