黛安
黛安

贊助科大創業大賽 信和助年輕人圓夢

發佈時間: 2018/04/03

贊助科大創業大賽 信和助年輕人圓夢

唔少後生仔都有一個創業夢,科技大學嘅「百萬元創業大賽」就係一個畀年輕人有機會得到種子資金去創業嘅機會。黛安仲知道,今年比賽獲得信和集團嘅支持,改名為「香港科技大學-信和百萬元創業大賽2018」。

科大呢個百萬元創業大賽今年已經係第8屆舉行,賽事由一個校內創業文化平台,發展到現時嘅地區性賽事,仲擴展到北京、廣州、佛山、中山等地。今年香港共有24隊參賽隊伍成功入圍參加「電梯簡報」環節,呢個環節係要參賽者模擬搭lift時遇到潛在投資者,要喺90秒內介紹自己嘅創業計劃,黛安聽到都覺得好刺激。

公關姊妹仲同黛安講,今年比賽首次推出網上公開投票環節,大會將24隊參賽隊伍喺「電梯簡報」嘅表現放上網,畀大眾投票選出最佳隊伍,投票結果更會佔比賽10%分數。

科大仲成立網上配對平台,幫參賽隊伍同來自唔同地區、有興趣參賽嘅人組隊,希望刺激多元思維。

黛安知道信和將會喺未來5年贊助科大創業大賽,信和集團副主席黃永光就講,比賽為年輕人提供一個分享觀點同交流創業意念嘅平台,佢希望勝出隊伍可運用獎金實現夢想。

撰文: 黛安 消息特靈八卦公關
欄名: 八卦名利場