馬會同心同步同樂日 曹星如笠臣「神奇會面」

黛安喺上星期日去咗馬會「同心同步同樂日」，撞到「神奇小子」冠軍拳手曹星如，原來佢為馬會「千里路踏前步」社區勵志計劃擔任星級「師友」，仲同大家分享佢面對困難永不放棄嘅勵志經歷。

曹星如勉勵大家唔好用一條「綫」將自己困住，只要勇於踏出第一步，之後嘅所見所聞都會唔一樣。佢仲話自己以前渾渾噩噩過日子，無諗過有機會成為拳擊冠軍，但之後自己不斷努力嘗試，最終才贏到冠軍。佢又寄語年輕人面對困難時，唔好灰心要積極面對，事情就可順利解決，就好似佢積極面對傷患，勤加鍛練，努力進行康復治療。

馬會仲請來人稱「神奇隊長」嘅英格蘭名宿白賴仁笠臣（Bryan Robson），同星如嚟個「神奇會面」。兩人見面時都相當興奮，仲交換紀念品，笠臣送出親筆簽名球衣，曹星如就以親筆簽名拳套回禮，笠臣仲即席帶上拳套影相，仲講笑話如果要同曹星如對打就唔使喇。

黛安知道，「同心同步同樂日」每年都會挑戰一項健力士世界紀錄，今年就創下「最多人同時為雕像塗色」嘅紀錄，有近千名中小學生親手完成951隻小型馬匹雕塑，健力士世界紀錄評審員仲即場確認紀錄，同頒發證書。