麒麟臂太吸睛 Kay爆張繼聰被男人摸

謝安琪（Kay）昨日出席愛培自閉症基金「藍服日2018」活動，為自閉症兒童及家長打氣。近日積極跑步操弗的Kay，大讚老公張繼聰身形，又指老公一雙「麒麟臂」太吸引，平日在街經常招惹男士「調戲」。

昨日活動上，有家長分享照顧自閉症子女的困難和壓力，Kay表示身邊朋友亦有孩子患自閉症。「有時聽到旁邊嘅人話個小朋友好曳，其實家長聽到呢啲說話會更難受，甚至面對奇異眼光，內心有好大壓力，所以希望大家多啲關注。」

下月復工錄音

日前Kay在網上貼出包到冚跑步的照片，她笑言︰「最近日日去跑步，包晒成身去跑，跑完都輕咗兩磅。（唔怕中暑？）大家都估緊我幾時中暑呀！我老公都話睇我幾時頂唔住，我又想鍛練自己嘅耐熱程度。」她透露現在跑步練氣，準備五月入錄音室為新碟錄歌，問到老公可有陪她跑步？Kay笑指阿聰為新戲要開始增磅：「佢目標增至190磅，而我自己想減到99磅，佢嘅體重係我嘅兩倍就最理想。」

滿意老公身材

Kay不諱言很喜歡老公現時的身形，更指老公的手臂比女兒的身軀還要粗壯。「我同佢出街，好多男人想摸佢，有啲仲成隻手臂係咁掃，又會吹口哨叫佢『聰哥』，佢好威㗎！反而女人見到佢就好少出手，最多只係口花花。」問她情願老公被男人還是女人摸？她笑說︰「男人啦，男人嘅角度都係欣賞同切磋比較多。」

採訪︰Pauline

攝影︰林良明

編輯︰李潔盈

美術︰梁政敏