林子善結婚 詩詠反串做兄弟 網民︰超級養眼！

去年十月註冊結婚的林子善，昨日與太太Kary（董佩欣）補擺婚宴，劇集《鐵馬尋橋》的一班好友包括鄭嘉穎、馬國明及唐詩詠等齊當戥穿石，當中詩詠女扮男裝勁吸睛。粉絲們除了祝福林生林太早生貴子，更指Chok爆兄弟團無得輸！

下周踏入36歲的子善，自05年轉戰電視圈後，拍攝了不少經典劇集，包括10年的《鐵馬尋橋》、11年的《怒火街頭》及去年的《乘勝狙擊》，現時熱播的《果欄中的江湖大嫂》亦見其蹤影。此外，他投資的茶餐廳生意亦漸上軌道，於是去年尾決定成家立室，與拍拖六年的圈外女友Kary註冊結婚，昨日就在將軍澳某酒店筵開63席大宴親朋。

子善爆眾男神電暈姊妹團

子善受訪時表示，為了婚禮儲錢儲足兩年，要七位數字埋單︰「除咗無綫返工，我出面都有搵錢，結婚唔理賺定蝕！」他強調太太是無價，戲言開門利市原本$9,999，自己加咗一點變成$9.999。至於戴上1.6卡鑽戒的Kary，就大讚丈夫值100分。

新郎哥又指一班型男兄弟團幫到手︰「姊妹們一見到袁偉豪，門都開咗三分二，再見埋馬明、嘉穎，就差唔多自動開門。」另一方面，詩詠昨晨亦指接新娘過程順利，Ben（袁偉豪）及黃嘉樂要食鹹竹蜂加芥辣，詩詠笑言︰「仲要做一字馬，不過無人做到囉！今晚（昨晚）馬明負責頂酒！」她特別在IG上載大合照及Po限時動態短片，高呼「淨係Chok就得」。

不少劇迷喜見「鐵馬兄弟團」陣容強大；有人亦稱讚詩詠穿格仔西裝顏值爆燈！

撰文︰Steven、Pat

編輯︰黃寶恩

美術︰梁政敏