黛安
黛安

麥當勞推新App 預先點餐 盡享優惠

發佈時間: 2018/04/04

麥當勞推新App 預先點餐 盡享優惠

全亞洲首個麥當勞App今日正式推出喇!黛安都即刻試用佢嘅「手機預先點餐」,係App點完餐之後,去到分店掃一掃QR Code再畀錢,唔使5分鐘就有得食,唔使排隊,非常方便!

香港人食個lunch都要爭分奪秒,麥當勞新App就幫到大家!App用法好簡易,點餐後去到餐廳可以揀用現金、信用卡、八達通,或者其他指定付款方法。公關姐妹話,今日至4月18號,只要成功註冊,就可以有2張5蚊折扣優惠券,買任何食品滿25蚊就用得。

新App亦都加入咗我的最愛、營養資料、麥麥送訂餐等功能,除咗有麥麥送專屬優惠外,仲接受提前7日訂單,以後開Party訂美食就唔使頭痛啦。姐妹仲話,其他優惠亦會陸續有來,好似晚上6點後買超值套餐送麥旋風、特價買新推出嘅菠蘿蝦堡等、積分卡同生日優惠等。

香港麥當勞CEO黎韋詩(Randy)噚日就率先同傳媒介紹,話舊年11月底係無宣傳兼無推廣之下,已經試行新App,到依家有8.7萬次嘅下載量,超過70%用家畀4至5星評價。佢仲話,由於有多款嘅電子落單方式推出,6月會招聘1.3萬位員工,包括月薪分店經理、顧客服務部職員同兼職人手。今年亦會增加10間分店,其中剛剛結業、有41年歷史嘅油麻地恆成大廈地庫麥當勞恆盛分店,今年第四季就會係同一位置嘅地舖重開。

Randy仲預告,McCafé會喺下個月中會推出「Bring Your Own Cup」活動,鼓勵消費者帶上自己嘅杯買飲品,今年亦陸續將發泡膠包裝轉做紙製包裝,為環保出一分力!

撰文: 黛安 消息特靈八卦公關
欄名: 八卦名利場