領養獅子王狗狗 籌款義助「動物朋友 」

黛安一向都鍾意小動物，各位若想領養可愛嘅狗仔，機會嚟喇！港灣豪庭廣場同動物慈善機構「動物朋友」喺今個星期日舉辦「獅子王狗狗領養日」，一眾待領養嘅流浪狗將以韓國人氣網絡漫畫《The Earth, Human and Animal》獅子角色為藍本，化身帥氣獅子王，盛裝等待有心人嚟領養。咁有意義，黛安都要快啲通知好姊妹。

大會公關姊妹同黛安講，活動當日亦有親善狗狗大使到場同大家合照，現場亦有寵物用品慈善義賣，所有善款都係用嚟拯救啲流浪貓狗，幫佢哋提供居住嘅地方同安排領養服務。同場仲有「復活動物拯救隊」主題裝置，而韓國人氣網絡漫畫《The Earth, Human and Animal》嘅萌爆動物更會喺港灣豪庭廣場同大家與眾同樂。

同場仲有一個水井裝置，寓意為草原上嘅動物帶來潔淨食水，希望提醒大家要保護環境，唔好隨意破壞，令可愛嘅動物失去棲息地方。