黃錦星推薦好書 介紹環保新生活

提起環境局局長黃錦星，大家都會諗起環保，但黛安最近發現黃局長除咗叫人唔好做大嘥鬼外，仲會推介大家睇好書。佢最近接受新地嘅新閱會免費閱讀平台《linepaper》專訪時，就介紹咗幾本好書，仲話其中一本書對佢影響好大，呢本書已經係廿多年前出版，就係《Our Ecological Footprint︰Reducing Human Impact on the Earth》，係佢喺加拿大研究院進修環保建築時睇嘅，內容就係將人類對環境造成嘅唔同影響，簡化成「生態足印」單位。

而另一本就係近期大熱嘅《斷捨離》，黃局長話，斷捨離係一種簡單生活態度，佢話大家擁有少啲物質，家居乾淨啲，人都開心啲。另一本佢推薦嘅好書係《山野無痕》，佢覺得書中所教自己垃圾自己帶走，同政府最近做緊嘅喺遠足徑撤走垃圾筒嘅做法理念相似，好值得大家一讀。黛安已經借咗嚟拜讀喇，你都唔好等！