黛安
黛安

太古捐書 破紀錄籌15萬本 周四起$10義賣

發佈時間: 2018/04/09

太古捐書 破紀錄籌15萬本 周四起$10義賣

正所謂「一日不讀書,言語乏味」,黛安早排聽到太古地產姐妹Wayne講佢哋搞咗個「書出愛心」(Books for Love)活動,想大家「捐書」義賣。黛安當然鼎力支持,全公司上下捐咗成十幾箱書出嚟!呢兩日聽Wayne講,活動反應好好,2個半月就收咗成15萬本書,係舉辦8年來最高紀錄,真係值得鼓掌!

900位熱心義工幫手分類

來自太古地產、小童群益會同義務工作發展局嘅900位熱心義工,近日都馬不停蹄將書分類,籌備緊今個星期四(12日)至星期日(15日)舉行嘅義賣活動。Wayne話,要用一段時間嚟分類,但暫時見到最多係英文小說同兒童讀物,啱晒做小朋友睡前讀物;黛安都割愛捐咗一批珍藏嘅飲食書,大家食晏或收工時行過太古坊ArtisTree,記住要上去尋寶啦。

今次捐書活動,唔止可循環再用舊書,將知識廣傳開去,連用嘅書枱都好環保㗎。Wayne話為籌備今次活動,早在農曆新年已去年宵攤位回收「舊竹」,「升級再造」變成書枱枱腳,足足整咗50張枱,方便放書義賣。

除咗有書買之外,場內仲有唔少期間限定嘅文青精品,好似本地扭蛋迷你雙月誌《蛋誌》就特登整咗56本「迷你書扭蛋」,本本迷你書都係人手製作,細到可放入直徑45毫米嘅扭蛋裏面,最重要係只賣50蚊一隻,收益同義賣善款一樣,會全數捐畀香港小童群益會同義務工作發展局。大會到時仲安排咗4個免費藝術工作坊,到時可整造型摺紙書籤、牆紙升級卡片套同硬皮鎖鏈繡綫筆記本等,名額先到先得,記住一早到場霸定位啦。

撰文: 黛安 消息特靈八卦公關
欄名: 八卦名利場