江嘉敏《果欄》喊功揮低馮盈盈 視迷︰睇到我都喊

本周五大結局的《果欄中的江湖大嫂》前晚驚爆催淚戲，劇中的黃嘉樂慘死，飾演其女友的江嘉敏（Kaman）及胞妹的馮盈盈先後悲從中來「鬥喊」，但對比之下，劇迷認為演戲經驗略勝一籌的Kaman交足戲，直頭睇到喊出嚟！

無綫時裝劇《果欄中的江湖大嫂》播出後收視不俗，長期企穩25點左右，同時亦成功令首度拍劇的16年港姐冠軍馮盈盈瘋狂吸Like，她演活惡形惡相的「小狼女」，除了濃濃MK味，更配上真我演出，令觀眾留下深刻印象，搶去女主角陳煒、男主角黃浩然不少風頭。

不過，前晚播出的第26集，輪到去年憑《親親我好媽》演純情學生妹入屋的江嘉敏成為焦點。Kaman於劇中幾經波折才與黃嘉樂相戀，但該集講述男方在懸崖邊為了拯救女友，慘遭大奸角李天翔以石頭重擊，最後黃嘉樂更死在女友懷中，惹人心酸。

馮盈盈處女作輸經驗

面對生離死別，Kaman喊得七情上面，更應愛郎遺願強裝歡顏，場面令人動容。至於飾演黃嘉樂胞妹的馮盈盈，亦在認屍的一場戲中，哭得死去活來，全晚劇情大賣洋蔥。

兩位同樣23歲的女星江嘉敏和馮盈盈先後「哭成淚人」，不過，大部分觀眾卻熱捧Kaman的表現真情流露，大愛她含笑落淚的演技超感人，完勝表情略嫌造作的馮盈盈。其實，Kaman可謂贏在起跑綫，她早在14年已入行拍戲，16年轉戰無綫拍劇，演出經驗無疑比馮盈盈豐富，相信兩位新紮花旦未來「有排鬥」。

撰文︰Steven、Pat

編輯︰黃寶恩

美術︰梁政敏