糖廠街市集重臨太古坊 綠色工作坊邊食邊玩

上班族要掃走「Blue Monday」，黛安又有好介紹。由下周一（16日）至6月29日，太古地產籌劃社區活動嘅糖廠街市集限定農夫檔將回歸太古坊，多達12個本地農夫輪流帶嚟各種有機時令蔬果，附近返工嘅姊妹，可趁lunch time行下市集。

講到明係市集，又點會得新鮮蔬菜賣咁簡單。黛安收到消息，市集首次聯同思網絡同聖雅各福群會賽馬會升級再造中心，舉辦午間升級再造工作坊。在幾個指定嘅星期一，有設計師及手作人教點樣將辦公室廢物或剩食，製作成一系列實用環保生活用品，例如飲品盒再造成散紙包同卡片套、將蔬果變成天然蠟筆，甚至連辦公室廢紙造筆、水果皮製成蚊香，認真係「綠色magic」。工作坊由下午12︰30及1︰15舉行，每節約45分鐘，想報名，可在手機應用程式Taikoo Social免費報名參加。

5月份市集更夥拍金鐘星街小區人氣飲品專門店Athletic Juice & Espresso Bar，用本地蔬果作主角，即時為顧客炮製新鮮有營果汁。由5月2日至11日期間，顧客更可在其攤位享用近期備受熱捧、以牛油果作盛器的Avolatte，真係飲得最新、最潮。

Athletic Juice & Espresso Bar在5月7日中午會舉辦咖啡拉花工作坊，每節約45分鐘，教參加者發揮創意做咖啡拉花。節目咁精采，黛安已經mark低咗日子同時間，call埋朋友報名先。