3D度身訂造枕頭 $45萬打造優質睡眠

枕頭係大家每晚瞓覺嘅恩物，但45萬一個嘅枕頭大家又見過未？日前英國皇室御用床褥Hypnos香港首間分店開幕禮，仲展出咗荷蘭物理治療師研發出、全球唯一、價值45萬嘅3D技術枕頭！

寢具可以大大影響睡眠質素，一定唔可以忽視。英國高級傳統手工床褥品牌Hypnos係唯一一個被英女王指定御用嘅床具品牌，有過百年歷史，聽到都知質素高。Hypnos香港分店日前開幕，黛安當然要去見識下！公司香港總經理鄧德華話，Hypnos每張床褥都由人手以羊毛、棉花、蠶絲等天然纖維製作而成，軟硬適中，仲有恒溫作用，唔怪得連英女皇都愛不釋手，就算係香港嘅潮濕天氣都啱用。

黛安仲見識到45萬蚊嘅枕頭，到底佢咩來頭？原來佢係由荷蘭的著名物理治療師Thijs Van Der Hilst透過3D高端技術，掃描人體結構度身訂造，Thijs同睡眠專家、專科醫生、工程人員等，花咗15年研究不同人體結構同睡姿，再用高級荷蘭記憶海綿、歐洲頂級蠶絲、甚至有效防電磁輻射的24K金綫，為客人度身訂造高級枕頭，當然價值不菲啦。

一向識享受嘅作家蔡瀾同藝人蘇玉華日前都有去到開幕典禮，佢哋兩個都異口同聲話，床褥嘅質素好重要，不容忽視！鄧德華仲送出價值六位數字嘅Hypnos高級床褥畀蔡瀾，今次真係有覺好瞓喇！