海洋公園結合動物互動科技元素 打造STEAM教育中心

時代轉變，依家嘅小朋友學習唔需要坐定定，黛安知道，推動教育一直係海洋公園嘅核心價值之一，好似海洋公園今年就推出兩項活動，畀小朋友透過唔同活動邊玩邊學習保育同動物嘅知識。

海洋公園業務拓展及教育執行總監李玲鳳介紹，海洋公園上個月24號起至下個月6號舉行嘅「親親動物月」，小朋友可近距離接觸「動物大使」水豚同赤掌獠狨，3歲以上嘅小朋友仲可以為動物大使準備小吃及餵食，如葡萄、藍莓、麥皮蟲等，畀小朋友了解水豚同赤掌獠狨嘅身體特徵同習性。

另一項活動就係「夜遊海洋歷險記」，參加者可夜行海洋公園，仲會組成團隊合作去完成任務。海洋公園探索及教育總監李美盈就話，參加者透過夜行可挑戰自己，學團隊合作同溝通技巧，小朋友仲可通宵留喺海洋奇觀，認識海洋知識。

海洋公園探索及教育經理張芝中仲同黛安講，公園嘅課程相當多元化，除學保育或動物知識外，仲有語言課程，可安排英語老師上堂，咁小朋友學保育知識之餘，仲可學到英文，課程長度都可隨參加者要求安排，相當有彈性。

海洋公園行政總裁李繩宗仲話，海洋公園會繼續強化教育旅遊，喺課程注入互動元素同融入科技，希望將公園打造成東南亞著名STEAM教育中心，吸引更多遊客。佢又提到，近年海洋公園家庭客愈來愈多，入境家庭遊客由2006年至2016年佔公園人客比例由10%增至16%，相信會持續增長。