「跑者無極」路跑賽 玩轉蘭桂坊

平日早上嘅蘭桂坊都係冷冷清清，但噚日朝就聚集咗接近300人，氣氛同夜晚一樣咁熱鬧，但今次就唔係燈紅酒綠，而係好健康嘅跑步氛圍！事關第二屆「跑者無極」路跑賽今年再度喺蘭桂坊舉行，「蘭桂坊之父」盛智文亦有現身主持起步禮，仲笑住為各位為跑手打氣，佢仲同黛安分享，跑步已成為香港新興潮流，作為「潮流之地」嘅蘭桂坊，當然支持呢項又潮又有益身心嘅活動啦。

今屆賽事設5公里個人組、無極個人組同無極接力組，其中無極組參賽者要喺1個鐘內完成最多圈數取勝，真係少啲腳骨力同耐力都唔得呀！黛安同一眾跑手傾過，原來跑蘭桂坊唔係一件輕鬆事，因途經唔少樓梯同斜路，勇奪5公里組別冠軍嘅跑手朱生，賽前就去咗跑樓梯集訓，仲專登訓練大腿內側肌肉同心肺節奏應戰。

呢日黛安仲見到香港長跑好手陳家豪，佢挑戰5公里賽事，仲跑得非常enjoy，衝綫後笑住大叫好玩，仲比原定路程跑多咗幾個圈，搞到黛安都好有衝動想跑埋一份！